تلوذ المعاني والقصايد عليه جياع
وانا اقول محراب الشعر قبلته روحه
ابااحايل حروفه عبث علها تنصاع
واسولف عن جروح كتم دمها نوحه
سمي الفرح فرحان يفرح به المطلاع
لو إن المعاني قصرت عنه مسموحة
غدى للهموم اللي تحوف الحشا نزاع
وبنالي من انقاض العمر بالامل دوحه
انا صاحبي مسك الرجاجيل ياهزاع
سواليف صمته تغني الناس عن بوحه
يشوفونه انه دمث خلق وكريم اطباع
وانا شايف ان الهيل لافاح من فوحه
ثلاثين عام أسري معه والفجوج وساع
وهو في خفوقي ثابتٍ يبني صروحه
اجي له من هموم الزمن والزمن ملتاع
واعود وانا صدري يرفرف من مزوحه
انا كيف ابادله الوفا صاع يتلي صاع
وانا خابره ماينلحق طيبه وشوحه
قلب لي خريف العمر في وقفته مرباع
رسم لي من جنون الوفا للوفا لوحه
بعدماانظر لسود الليالي نظر مرتاع
عطاني فضاه ونور لدنيتي ضوحه
على الحرام انه جبل طيب ما ينباع
ولا به حكي ياصل مزاياه وشبوحه
عطاياه زادت عن عطايا المطر للقاع
عطاياه صارت فوق نفسه ومصلوحه
من اعظم من اللي ضم صدره غلاي اوجاع
ومن انبل من اللي صحتي سبة جروحه
كساني وفا والجمني وكل شعري ضاع
وقصرت الكلام وهلت العين مفضوحه