[عادل الدوسري]

آآآآآه يا أمي

بسم الله أبدأ

ياهاجس الأشعار ماني مخليك
حتى تعبر كلما احس فيّه

القلب ما يرتاح حتى يغنيك
ويردد الأمثال صبح وعشيّه

واليوم عبّر عني الله يخليك
دام المشاعر بين الأضلاع حيّه

وأصدق شعور إنسان ماهوب خافيك
في الأم كل الشعر والله شويّه

يمّه ماغير الله وحده يجــازيك
مهما عطينا ما نجازي العطيّه

يمّه تموت حروف شعري ما توفيك
تعجز جميع حروفه الأبجديّه

يمّه أنا والشعر فدوة مواطيك
نزفي ودمّي والعروق النديّه

ياما سهرتِ والسهر كان يضنيك
بس المهم أرتاح نومه هنيّه

وياما دعيتِ الله أحقق أمانيك
وأجيب لك أغلى شهادة هديّه

صحيح أميّه ولكن راضيك
أميّه وتسوى كذا جامعيّه

أنتِ منار العلم والله محليك
في عيني أحلى من جميع البريّه

يمه ولا أحد في البرايا يحاليك
أنتِ وبس الله يخليك ليّه

مهما حصل مانيب والله ناسيك
برّك وشكرك فرض واجب عليّه

والقلب ما يرتاح حتى يناجيك
ويردد الأشعار صبح وعشيّه

قلم عادل الدوسري