[حسام المجلاد]

انا قلبي قسمته من رداة حظوظي لنصفين
لشعري نصف؛ وانتي جاك نصفه ليه ترمينه

مادام إني شريتك عِشق وارخصتي به الشارين
ابرحل دون لاوادع .. وسّوي ماتسوينه

كتبتك حب يومك مغرمه من قلبك وتدرين
بإنك ساكنه قلبٍ لياضِعتي .. تدلينه

تجيني خاطف لونك زعلك ودرّتك بالعين
واداري خاطرك واخاف مزنك لاتهلينه

يضيق الكون لاضقتي.. ويوسع بعد ماترضين
وانا اجاهد تعبك ودمعك أقف بينك وبينه

واقول إن العتب لامن جرحتيني على السكين
عذرك الحب خلي عذرك ومو شرط تبدينه

عطيت ومارجيت إنّ العطا بالناعسات يبين
لو إن الصبر من طوله يطيح ولا تجازينه

آبذكرك .. ياكلّ الأماني* .. دام تتناسين
من اللي يضحك بوجهك وخلفك دمّعت عينه

من اللي كان يقسم لِك رغيف اماله لنصين
مخافة ياكل الجوع امنياتك* .. تبّت يدينه

رسم باحلامه العيشه معاك وسَكنّك / دورين
وكمل نصف روحه قبل لايكمل معِك / دينه

من اللي عاش بالاحلام والواقع نساه سنين
يخاف يخلّي احلامه .. وخايف لاتخلينه

"فقير لحقّ رقبته على شان الهدايا دين
ثريٍ بالمحبه واعذب احساسه ملايينه"

من اللي لاتذكّر طاري غيابك نطق تكفين
وانا تكفين للي مِثل حالي مره وشينه

نسيتي طيِش جياتك عليّ ومطلبك بيتين
وانا اغني قصيدٍ كان يزهى بك وتزهينه

حسافة شعري اللي قلت فيك ومطمعي تقرين
حفظته عن عداه وجاه موته من محبّينه

اباخذ ماكتبته فِيك واتبع جرّة المقفين
وادوّر لي مكانٍ ما لذلّي داخله عِينه

واحفظه مثل حفظي للكرامه لين يوم الدين
قصيدٍ حاضر وراعيه .. مادّور معه بِينه

كتبته كيف ما ادري ولكن عارفٍ شيّين
*انا فيه ابتليت .. وعذربوني ناس بالينه

ابي أطلبك لأولّ مره بعمري إذا* .. تلبين
تناسي كل بيت فيك لو صعبٍ تناسينه

انا ياكثّر ماضحّكت ثغرك.. جربي تبكين
غلاك ومات ..والميّت نموت وماتصحينه