[حسام المجلاد]

اعتذر عن غيابي لبعض الظروف الدراسية واهدي لقلوبكم هذه القصيدة :

يامحمد يوم سولفت مدري وش تقول
شارد فكري وصدري من الفرحة خوى

ناظر عيوني وهي تختصر لك كل قول
حمْر؛ من سبّة سهرها ومن دمع الجوى

المحبة تكْوي قلوب .. وتسفّه عقول
قبلها ياقوي؛ وبعدها* .. مابي قوى

علةٍ لاصابت العاقل يْصير مهبول
مالها فوق البسيطة ...لياحلّت دوى !!

للغرام حروبٍ أشد من حرب المغول
حالة الخفاق منها يشابه نينوى !

يالله ليامن نوى الصدة الظبي الجفول
لاتسمّح دربه ولاتتمم* .. مانوى !

ياوجودي يوم شفْته على الفرقى عجول
شاري الفرقى؛ وفرقاه ملعونة ثوى

لعنبو شوقي على نظرة الطرف الخجول
لأبتسم؛ ماكِن غيره على الزّين إحْتوى
*
ﻛﺎﻓﺮ ﺑﺎﻟﺤﺐ ﻣﻦ ﻗﺒﻠﻪ ﻭﺟﺎﻧﻲ ﺭﺳﻮﻝ
ثم قفى؛ والحزن ذيبه بجوفي عوى

ماتوقعت الهوى يبكي عيال الاصول
لين ماحبّيت من عوّف القلب الهوى

ماحسب لإسمٍ يورث بِعدواني ذهول
تِقلب الدنيا لْيامن .. تعزويت بّـ"هوى" !!

آه من حظٍ ليامن طلبته بـ القبول
ماسمعت إلا أبعد؛ ومالك لْوصله لوى !!

ضيقتي بعده تعاقب على 4 فصول
والطواري لاتذّكرت .. "نّزاعة شوى"

ماقدرت ألقى لصدّتك يالغالي حلول
دبّ في الياس يوم ازرق دموعي هوى

ورغم هذا مانسيتك لو الفرقى تحول
باقيٍ بالروح وِدك على أعلى مستوى

اشهدك إنّك نعمة وْعادت النعمة تزول
ماشكرت الله عليك؛ وتخطّفك النوى !!

ايه احبّك لو غيابك .. مع المدّه يطول
واكرهكْ لاصارت أصابع يديني سوى !!

* ملاحظة "هوى" عزوة جدي الشيخ عقيل بن راكان المجلاد