منتديات أبعاد أدبية - الهبوب الصلف

‏

بسم الله أبدا

الغنوج اللي من العام متعبنا هواه
يا هل المعروف شوفوا لنا دبره معه

نتقدّم و نتأخّر ونمشي في رضاه
ونتحرّى موسمه بالفصول الاربعه

ما عطانا حق يوم إن ربي قد عطاه
من كنوز الزين ما يرتضيه و يقنعه

ولا جزانا بالوفا يوم حنا في وفاه
ما بحثنا علم ولا كل هرجٍ نسمعه

وما ذكر قلب ٍ يبيّح من الفرقا خفاه
يجحد العبره و يخفي همايل مدمعه

وما رحم منهو من الشوق وصّل منتهاه
كل بيبان الوصل في رجاه مشرّعه

عزّتي للي مضيّع ترابه من سماه
يطرد المقفين والدرب الايمن ضيّعه

دالهٍ في حبهم مايبي يسمع وصاه
كل ما يزمي سراب المحبه يتبعه

في بحر سبعين قامه حداه اللي حداه
والهبوب الصلف في غبّة الماي طبعه

الله يسامحه بس

عادل