أعجبتني هالابيات وجيت أشارك بها



أرّخوا لك عيد وانتي عيد يُمّه
................ من لمحْت بوجهك النور وعرفتك
كل نظره منْك عيد وكل ضمّه
................ احسبي كم عيد لي من يوم شفتك
يا مسا الفردوس يااغلى من تضمّه
.............. في الثرى لحدين والله ما نصفتك
سامحيني يا اطهر اهل الارض ذِمّه
................ لو قدرت اسابقك للموت طفتك
لو قدرت افديك سقت الروح يمّه
............. لو قدرت اخطفك من كفه خطفتك
يا مسا الرحمات ياازكى عطر اشمّه
................ ياندى زهر الحياه اللي رشفتك
طفلك اصبح رجل بين عيال عمّه
.............. له عيون اشقر ويمنى ذيب تفتك
بس باقي طفل قدامك تخمّه
.................. نظرتك ويقول للذنب اقترفتك
يعترف لك باكبر ذنوبه بفمّه
................ يحسبك تدرين لا قلتي كشفتك
تحت رجلك جنته ورضاك همّه
.............. وش علي ان قالوا الجهّال خفتك
خفت فيك الله ولا خفت اهل نمّه
................ لو طلبتيني عيوني ما كسفتك
صدق مااعرف عنك غير اللي المّه
................... من كلام ابوي لكني ولفتك
من خذاك الموت واصخى لي بعمّه
.............. قمت افتش داخلي لين اكتشفتك
صرت حافظ كل شي عنك واتمّه
............. كم كتبتك ..كم قريتك كم عزفتك
كم حضني ثوبك وعانقت كمّه
............ اسهر احكي لك ولانمت التحفتك
صدقيني شاعرك صرتي بدمّه
........... لو جرحت اقصى شراييني نزفتك
هالغلا كله وانا مااعرفك يمّه
.......... يا ترى وش كان اباكتب لو عرفتك



.
.



لـ علي السبعان



لك كل الود خالد