اقدّم التقدير والشكر واجب
من قلب قلته يالرجال الكريمه


في ملتقى الإبداع مافيه حاجب
ديوان عامر بالعلوم العظيمه


مجلس قصيد ٍ من خيار المناجب
شكراً على التكريم شيمه وقيمه


ماني لدعوة طيّب الأصل شاجب
رجل المكارم يابوقاسم صتيمه


محمد_الثوعي

ماني من الشعر والشعار متهيّب
لو يحضر الفين شاعر ماظهر ناقد


الراس شيّب ترى والفكر ماشيّب
والناب قارح وزند العود متواقد


الفكره اللي بكر تفرق عن الثيّب
وانا بعلم الأدب والشعر له عاقد


حلقت باعلى سما بعيد ياقريّب
ناظر بعينك تشوف البدر يافاقد


سحابة شعري عسى مردودها صيّب
تروي قلوب ٍ مع الامجاد تتعاقد


بالموقف اللي حدث ماكنت متغيّب
حضوري واجب تركت النوم للراقد


المجد يبقى مع الايام ياطيّب
والشعر لوما حبكته يعترض حاقد


*#محمد_الثوعي*

لا تجازي بالهجر من هو خليلك
بعد ذيك المعرفه تقطع وصالك
واصل المشوار مابجهل جميلك
شفت قلبي راح يمك وانتحالك
لو تقول الناس قلبك هو دليلك
مابقالي قلب من سطوة دلالك
المشاعر في ضميري تستميلك
ودها ترضي غرورك وانفعالك
لا زعل قلبك معك يتعب عميلك
من يحبك صار حاله مثل حالك
من تفيا تحت ظلك يستخيلك
غيمة ٍ بالعشق تستمطر مخالك
من كثيرك ما لقيت الا قليلك
من قليلك طبت والعزه لفالك
في صباحك كنت والا في مقيلك
في حضورك مختلف هذا مجالك
ردفك اللي منتثر فوقه جديلك
شال حمله ما تردا واشتكالك
فتنة ٍ مالك شبيه ٍ وسط جيلك
يافريد الحسن يامصعب منالك
اختلف كلي وانا جالس قبيلك
عطرك الفواح من صدرك وشالك
لو لثمت الصدر باثمل واشتكي لك
عن ضياع العمر والغربه مهالك
كم شجاع ٍ بالمحبه ينتمي لك
سلمك سيفه ودرعه والتجالك
احترق والشوق مايبرد دخيلك
غير في وصلك ولا ودي بدالك
اذكرك لازلت والطيبه حصيلك
مانسيتك والعطاء اجمل خصالك
لمّاجيتك بالمساء من سلسبيلك
ذقت شربه ضعت كلي من جمالك


محمد الثوعي

يا عيد ناد اللي بدربك يجوني
خذهم معك ياعيد جيب الاماني
ياعيد كم توله عليهم شجوني
مر المنازل شوف من هو بكاني
ياعيد كثر الهجر غيّر ظنوني
لكن فؤادي بالهوى من بلاني
مدري تناسوا بهجتك من نسوني
والا معك وقت الفرح عمر ثاني
لا قلت مالي في بشر مايبوني
يحرك الاحساس هاتف زماني
عطيت لكن وينهم ، ماعطوني
ياعيد ماني في المحبه أناني
ياليت بحضورك حبايب دعوني
ثالث سنه والقلب ينزف اغاني
اليوم لو غنيت من يسمعوني
الصوت غايب .عيا ينطق..لساني
ابيات شعري من تراثي ولوني
مطرزة باعذب شعور ومعاني
ياعيد من كثر المواجع عيوني
في غيبة الاحباب دايم تعاني
ياليتهم بالحلم ساعه لفوني
واقول من حبيت صدفه لقاني
أقول ياللي بالوفاء تذكروني
مبروك عيد الفطر واحلى التهاني


محمد_الثوعي

نزهم عليكم وانتم اللي مقفّين
الصوت عدا ربعة ٍ من وراكم
قلوبكم ماتقبل النصح ياسين
تفكيركم محدود ربي بلاكم
بالشر دايم عندنا مستعدين
والخير مامن خير يقطع نباكم
يا منكرين الحق والعلم طاغين
ماشفت بالدنيا رجال ٍ كماكم
نقّالة ٍ للهرج و سط الدواوين
الناس ماتسلم بعد من غثاكم
ياكثركم عند الخطايا مجدين
وياقلّكم فالجد يظهر رداكم
ياما سمحناكم ولكن مضلين
الطيب مبعد عنّكم ما يباكم
كنا معاكم في جميع الميادين
مانسمح اللي يقترب من حماكم
اليوم صرتوا من كبار المعادين
ياليت ما تمطر عليكم سماكم
ماعاد للتقدير ايّت مضامين
اليوم مافي من يقدر لحاكم
عشنا مع العالم رجال ٍ عزيزين
ندرك علوم الطيب نرفض خطاكم
قلنا كلام الحق ما نتبع الشين
كل ٍ في دربه ما ندوّر رضاكم


محمد_الثوعي

.لازال هناك متسع
من شجن!!

سجينه بس .ماهي.. بالسجينه
........قلوب.الناس .معها.واسجنتها

غريبه.. لو تقل.. بنت..المدينه
........هجر وايضا .قرى ماوطنتها

حدايق ..ورد ..فل ..وياسمينه
........دنت... لكن ..يديني ..ماجنتها

ولا تشري..ذهب ..من...بايعينه
........يدين .. الخالق .. اللي.. زينتها

وانا..بين ..المواجع..والسكينه
........عيون.الحب..طارت واحضنتها

غدت ..احلام ..عمري باربعينه
........وعشر..اعوام .. مرت .ماعنتها

نست شاعر تعذّب من سنينه
.........كتب..واكثر...بيوته .ضمنتها

وقلب ٍ قد شكى سطوة حنينه
.........يكابد.. بالعمر..من ..هيمنتها

فتحت.الفيس..والذكرى حزينه
........لقيت.. اسمي ..بنص..مدونتها

ادين .. الحظ ..وايامي.. غبينه
........جهاتي ..الاربعه..من .عنونتها


محمد الثوعي

في رثاء البدر الله يرحمه.

غاب البدر والصمت عمّ...الاماكن
اكبر فجيعه موت. شاعر..وانسان

رحل ولكن وسط الأعماق...ساكن
يبقى مع الاجيال.. حاضر بالازمان

بكت عيون الشعرر والحبر...داكن
تدثّرت كل. ..المعاني ...بالاحزان


محمد_الثوعي