أضعفتني وأنت تعرفني قوي باس
وتدري على فرقاك مانيب قاوي

وشفيك ترميني على منة الناس ؟
وشفيك ما ترحم رفيقك وتاوي ؟

بيني وبين السهر قصة غراميّة
اتناه لا غاب وان ما جيت يتناني

بأسباب منهو تركني دون ماويّة
اللي استباح الغياب وزاد بأحزاني

ابو ملامح عجم وإسلوب كردية
قولوا له اني جريح الحب وأعاني

اما رجع لي وزاد الشوق حنيّة
وان ما رجع علموه شلون يرثاني

لله امرك ياحزن ياللي على جرحي قويت
تعال عن برد الشتا بضلوع صدري واستقر

لا يزعجك منظر ركام بداخلي وإحطام بيت
ما دمره غير الغلا وكبر الهقاوي والفقر

ياقلب لو ماهزتك كلماتها ،، منها انكويت
اقسم فلا تهزك رياحٍ عاتية ولا مطر

اووواه ياذيج الوصوف الساكبة ع النار زيت
تفيض لج كل المساحات بخفوقي وتنغمر

أصدق غلا واعذب غلا ماخانته وانا وفيت
احبها كثر الاماني وحلم عمري والبحر

اللي تكافح هجتمي بقوة دفاعٍ مستميت
تصنيفها تحفة ثمينة راقية ومما ندر

مدري اذا الاقدار حدتني على الضيق ومشيت
سواتي سواة العزيز اللي من الذل انتحر

قولوا لها بغيابها ما قد رقدت وما اهتنيت
قولوا لها محمد على الفرقا ضعيف وماقدر

قولوا لها من عقبها كم هزني الشوق وبكيت
قولوا لها كل ثانية من بعد شوفك يحتضر

قولولها بفراقها اني حزين وما سليت
الا مع صورة وقطعة خام وبيوت الشعر


محمد ابوالروس

تكرم مدينة لاجل شعبي (بسيطة)
تنقال من باب الدعاية والإعلام

للي يشوف الشعب طوفة هبيطة
يخوض بالامثال تسليك وأوهام

يزعج مسامعنا بفحوى شريطة
كلام مستهلك ومن غير ارقام

ويرسل خلاياه الغبية العبيطة
منشان تقنعهم بأضغاث الاحلام

لكن ابو سلمان في راس عيطة
محمد اللي تعرفونه ليا حام

جرح المواطن في يدينه يخيطه
يوم ان غيره يفتق جروح الانام

صادق مع نفسه وفاهم محيطه
وبينه وبين الشعب ما يرفع الجام

مبداه لأجل الشعب تكرم خريطة
وبشوت وبيوت ومناصب وحكام

تشوف فعله قبل تسمع شريطة
مغنيه فعله عن تزلاف الاعلام

ما مسك شؤون البلد للسقيطة
وما استورد ابواق وبهايم من الشام

يدحم بمتنه متون ماهي بسيطة
وراه شعب ان قال قدام .. قدام

وخلا عدوه يصدم بعرض حيطه
الحيطة اللي من صدمها فلا قام

وياكم من ألسن خبيثة سليطة
من خوفها حطت على حلوقها لجام

يكفيك كلب الضاحية من فحيطه
صلى على سلمان جهراً بالاعلام